Sokoł Ralbicy/Hórki

Z dobyćom bychu Ralbičanscy koparjo magisku  hranicu  40  dypkow  překročili.  To  žadaše  sej  tež  jich  trenar  Pětr Bejmak. Domjacy, kotřiž so dale a bóle srjedźnemu  polu  tabulki  přibližeja,  su dotal  wurjadnu  druhu  połseriju  hrali. Zdobom  porazychu  hižo  tajke  mustwa kaž  z  Biskopic  a  Ćiska.  Tak  mějachu Sokoljo tola jara ćežki nadawk. Koparjo wokoło kapitana Statnika započachu hru koncentrowanje a ju w prěnich 15 mjeńšinach postajowachu. Prěnju šansu mějachu přez Domašku. Jeho hłójčkowany bul pak zleća wyše łaty. Hnydom po tym steješe samsny hrajer sam před domjacym wrotarjom Kaiserom. Při dwuboju su  tón  bohužel  zrani,  tak  zo  dyrbješe druhi wrotar domjacych Mai do „klětki“. Hosćićeljo běchu předewšěm při wólnych kopach  jara  strašni.  Sylny  třělc  Fließbach, kiž bě dotal hižo dźesać króć do čorneho trjechił, je wosebje derje na wrota Gloxyna třělał. Ale stajnje bě Ralbičanski wrotar dobyćer. Faktisce z wothwizdanjom  prěnjeho  połčasa  docpě  Lulak tola hišće nawjedowanje za Sokoł. Jeho wólny kop bě Schöne do swójskich wrotow podlěšił. W druhim połčasu su Großnaundorfčenjo  ćišć  wočiwidnje  zesylnili.  Hosćo mějachu  ćeže,  ze  swójskeje  połojcy  so wuswobodźić. W 65. min. padny zasłužene 1:1. Tónraz zleća wólny kop Fließbacha  njedźeržomnje  do  Gloxynowych wrotow.  Jeno  šěsć  mjeńšin  pozdźišo samsna situacija: Tónraz bu bul wotfalšowany. W centrumje šěsnatki pak steješe Moschke, kiž zbliska 2:1 třěli. Tola Ralbičenjo njedachu so zatrašić. W 75. min. přesadźi so Bjeńš na lěwym boku, jeho přihrawku Domaška Lulakej wotpołoži, kiž trjechi swoje druhe wrota dnja a zdobom   wuruna.   Po dalšich   dźesać mjeńšinach Sokoljo znowa nawjedowachu. Wólny kop Lulaka bu dlěši a dlěši – wjacori hrajerjo jón skomdźichu – a zleća do  dołheho  kuta.  Wyskanje  bě  wulke, ale hosćićeljo hišće raz wšitko spytachu. W 90. min. postaji sudnik jědnatku přećiwo  Ralbicam.  Domjacy  Wedlich  ju wěsće přetwori. Njerozsudny wuslědk bě sprawny a zasłuženy.  AS